புனித ஞானப்பிரகாசியார் க.வா.கழகத்தின் கலை, கலாசார பிரிவில் திரு.ஆ.ஜேசுதாசன், திரு.ம.யோசேப்நாயகம் ஆகியோர் சிறப்பாக செயல்பட்டனர். எமது கழக அங்கத்தவரால் இருபத்தைந்துக்கு (25) மேற்பட்ட நாடகங்கள் மேடையேற்றப்பட்டன. குறிப்பாக கைவிரல்கள், நெஞ்சமே நீ சொல், வீடு சிரிக்கிறது ஆகிய நாடகங்கள் பல தடவைகள் மேடையேற்றப்பட்டன. அன்று யாழ்ப்பாணக் குடாநாட்டில் சிறந்த நாடகங்களாக இருந்தவற்றை எமது அரங்கில் மேடையேற்றி கிராம மக்களின் பாராட்டை புனித ஞானப்பிரகாசியார் க.வா.கழகம் பெற்றது. அவற்றில் கண்டி அரசன் (யாழ்ப்பாணம்) வடக்கும் தெற்கும் (அளவெட்டி) அலாவுதீன் (கோண்டாவில்) ஆகியவற்றை குறிப்பிடலாம்.

வருடா வருடம் ஒளிவிழா நிகழ்வில் பேச்சுப்போட்டி, நாடகப் போட்டி, கவிதைப் போட்டிகளை நடாத்தி பரிசில்கள் வழங்கப்பட்டன.
இவற்றில் பங்குபற்றியோர் இன்று சர்வதேச அரங்கிலும், தேசிய மட்டத்திலும் பிரகாசிப்பதை அவதானிக்கலாம்.

புனித ஞானப்பிரகாசியார் கத்தோலிக்க வாலிபர் கழக முன்பள்ளி பாடசாலை எமது ஆலய சூழலில் ஒரு முன்பள்ளியை அமைக்க விரும்பி எமது வாலிப கழகத்தினர் திருமதி அரியமலர் சூசைதாஸ் அவர்களை ஆசிரியையாக்கி 1975ம் ஆண்டு பங்குனி மாதம் வளர்மதி முன்பள்ளி என்ற பெயரில் ஆரம்பிக்கப்பட்டது.

பெற்றோரின் ஒத்துழைப்பும் பிள்ளைகளின் வரவும் அதிகரிக்கவே ஏழாலையில் சிறந்த முன்பள்ளி என பெயர் கிடைத்தது. ஒளிவிழாக்களிலும் மற்றும் கலாசார நிகழ்விலும் சிறுவர்களின் ஆற்றல் வெளிக்கொணரப் பட்டு ஆசிரியையின் சேவை எல்லோராலும் பாராட்டப்பட்டது.

இப்பகுதியில் இடம்பெற்ற அசாதாரணநிலை காரணமாக தொடர்ந்தும் இவ் முன்பள்ளி செயல்பட முடியாத காரணத்தால் 1990ம் ஆண்டளவில் செயலிழந்தது. மீண்டும் இளையோர் மன்றத்தால் 2006ம் ஆண்டு புனித இசிதோர் முன்பள்ளி என்ற பெயரில் மீள ஆரம்பிக்கப்பட்டு இயங்கிவருகின்றது ( இது தொடர் செயற்பாடுகளை புனித இசிதோர் முன்பள்ளி பக்கத்தில் பார்க்கலாம் ).

கழகமாக இருந்த பொழுதும் எமது கிராமத்தின் இளம் யுவதிகளையும் உள்வாங்கி கலை மற்றும் விளையாட்டுத்துறைகளில் அவர்களின் கணிசமான பங்களிப்பு இருந்துவந்திருக்கின்றது. இது அந்தக் காலத்தில் இலகுவான காரியமாக இருந்திருக்க முடியாதென்பதும் பல கிராமங்களில் வாலிபர் சங்கங்களுக்கு முன்னுதாரணமாக இருந்திருக்கின்றது. கத்தோலிக்க வாலிபர் கழகமாக நிறுவப்பட்டிருந்த போதும் எமது சூழலில் வாழ்ந்த இந்து இளைஞர்களும் தங்களது கழகமாக எண்ணிச் செயற்பட எந்த தடையும் இருக்காத்தால் எமது கிராமத்துக்கு மேலதிக பலம்சேர்ப்பதாகவே இருந்திருக்கிறது.

ஞாபகத்திலுள்ள இந்து இளைஞர்களுள் மகேஸ்வரன், அருமைநாயகம், சிவஞானம் போன்றவர்களை குறிப்பிடலாம். அடுத்த தலைமுறையை சேர்ந்த எமில் ஜேசுரட்ணம், ஜேம்ஸ் தவராஜா, ஜெயச்சந்திரன், ரகுவேந்திரன், பவளநாயகம், மதுரநாயகம் போன்றவர்கள் பெரும்பங்காற்றினர். இவர்களது காலத்திலே தான் ஞானப்பிரகாசியார் திறந்த வெளியரங்கும், வாசிகசலையும் கட்டடப்பணிகள் முழுமை பெற்றன் அவர்கள் காலத்தில் பங்குத்தந்தை வில்வரசிங்கத்தின் வழிகாட்டுதல் இருந்தது.

அடுத்த தலைமுறைக்கு கைமாறிய போது அலோய் றூபன், றணேந்திரன், நிர்மலன், அலெக்ஸ், ஞானநாயகம், விவேகானந்தன், அருமைநாயகம், பேடினன் மோகன் ஆகியோரின் செயற்பாட்டுக் காலம் இக் காலப்பகுதியிலேயே கழக்கட்டிடத்திற்கு மின்சார இணைப்பு ஏற்படுத்தப்பட்டது. இதில் மதுரைநாயகம், றணேந்திரன், தனநாயகம் ஆகியோரின் பங்களிப்பு அளப்பரியது. இந்த இரு தலைமுறையினருடனும் நண்பனாகவும், நல்லாசானகவும், வழிகாட்டியாகவும் செயற்பட்ட ஆசிரியர் திரு சூசைதாஸ் அவர்களை இலகுவில் மறந்து கடந்து செல்ல முடியாது.

இளைஞர்களின் உருவாக்கத்தில் பங்குத் தந்தையர்களுடன் இணைந்து செயற்பட்ட திரு.கொ.றொபேட் (றொபேட் ஐயா) திரு.க.ஞானப்பிரகாசம்(கிளாக்கர் ஐயா), திரு.ச.செல்வரத்தினம் இம்மானுவேல் (இம்மானுவேல் அண்ணர்) அதிபர் பே.சூசைப்பிள்ளை ஆகியோரின் பங்களிப்பு மேலோங்கி நின்றது. எம்மால் அன்போடு அழைக்கப்பட்ட இம்மனுவேல் அண்ணர் புனித பத்திரிசியார் கல்லூரியின் ஆரம்ப துடுப்பாட்ட வீரனாகவும் இடதுகை வேகப்பந்து வீச்சாளராகவும் இருந்தபடியால் எமது கழக விளையாட்டுப் பிரிவின் பயிற்சியாளராக இருந்து வழிகாட்டினார்.

இடப்பெயர்விற்கு பின்னர் 2005 ம் ஆண்டு பங்குதந்தையாக இருந்த P.F.இராஜசிங்கம் அடிகளார் ஏழாலை சூராவத்தை இளைஞர்களை இணைத்து கத்தோலிக்க இளையோர் மன்றத்தை உருவாக்கி போசகராக திரு.C.A தயாபரன் நியமிக்கப்பட்டு 2016 ம் ஆண்டு செயற்பட்டது.

2006 ம் ஆண்டு எமது இளையோர் மன்றத்தின் தலைவராக ஹிமால் அவர்களும் செயலாராக றொஜினா அவர்களும் பொருளாராக சோபனாவும் தெரிவுசெய்யப்பட்டனர் . இந்த காலத்தில் புனித இசிதோர் முன்பள்ளி என்ற பெயரில் மீள ஆரம்பிக்கப்பட்டது .தொடர்ச்சியாக பல செயற்பாடுகள் இடம்பெற்றது குறிப்பிடத்தக்கது தொடர்ச்சியாக நிர்வாக உறுப்பினர்கள் பதவியேற்றபோதும் எந்த தடைகளையும் நீக்கி தொடர்ந்து முன்னேறிக்கொண்டிருக்கின்றது.

தொடர்ச்சியாக புனித ஞானப்பிரகாசியார் கலையரங்கில் 2010 ம் ஆண்டு பத்திரிகை படிப்பகம் மீள ஆரம்பிக்கப்பட்டது பத்திரிகைகளை இந்துமத சகோதர்களும் இணைந்து வழங்கி வருகின்றமை குறிப்பிடதக்கது. இதற்கான தளபாட வசதியை கஜந்தன் அவர்கள் அன்பளிப்பு செய்துதந்தார், புனித ஞானப்பிரகாசியர் கழகத்தை ஆரம்பித்து இன்றுவரை முன்னுதாரணமாக இருந்த இளைஞர் யுவதிளை முன்னுதாரணமாக கொண்டு இன்றுவரை அஞ்சலோட்டத்தை ஓயவிடாமல் ஓடிக்கொண்டிருக்கும் அனைவருக்கும் பாராட்டுக்கள்.